Punto de partida-chegada: ponte do Sisto (Gándara, Zas)

Percorrido: circular

Distancia: 10 km

Duración aproximada: 3 h

Dificultade: Baixa

Esta ruta denomínase así porque vai seguindo o curso alto do río do Porto e do seu afluente, Budián. É un itinerario de gran beleza natural, na que destacan as súas fervenzas.

Saímos da ponte do Sisto e tomamos camiño cara á fervenza de Budián, na que dispoñemos dun banco que nos permite gozar do espectáculo visual e sonoro producido pola caída da auga. Volvemos á aldea de Budián e desde alí trasladámonos a Parga, para ver a segunda das fervenzas. Seguimos camiño cara ao Rabiñoso un espazo natural de gran beleza, formado pola fervenza, bosque ribeirán e varios muíños. Desde este lugar baixamos ao punto de inicio.