Punto de partida-chegada: Refuxio de Verdes-Pontedona antiga

Percorrido: Lineal

Distancia: 1,70 km

Duración aproximada: 1h (ida e volta)

Dificultade: Baixa

Esta curta ruta permítenos percorrer un dos lugares máis fermosos do curso do río Anllóns. Iniciamos a camiñada no Refuxio de Verdes, un espazo no que o río se encaixa e divide o seu leito en varios brazos, formando rápidos e pequenas fervenzas, que xunto co bosque de ribeira que medra arredor, fai deste lugar un dos máis acolledores da comarca de Bergantiños.

Atravesamos a canle do río a través das pontes peonís e continuamos o camiño pola banda esquerda. Pasamos por algúns muíños en ruínas e, despois dun cambio brusco da canle do río, axiña chegamos á Pontedona antiga, unha construción que data do século XIX, constituída por catro machóns de pedra e as lousas que forman a calzada.